Généalogie autour du Houlme - Orne

11/5/1606

Ledit jour est décédée la femme de Guillaume

Thommeret viron deux heures après midy

estant allée laver sa buée [1] a un doibt [2] près la

Ruppinière, estant malade de mal caduc [3],

de quoy elle tomboit fort souvent, est tombée

dedans ladite eau et estoit avecques elle ung

son petit enfant lequel est venu aux voisins

appeler dissant "ma mère est chutte dedans

le doibt". Mathurin et François Thommerel et

plusieurs aultres l’ont trouvée dedans ledit

doibt et l’ont reterrée n’ayant plus de vie

donc a esté emportée à sa maisson. C’est trouvé

plus de cinquante personnes à voir ceste

povre créature. [Elle] se estoyt par plusieurs fois

failly à se bruller à cause de ladite maladie.

Ayant interrogé, les voisins m’ont dict n’avoir

congnoissance quelle fust subjecte à auculne aultre

accident. Mesme Jehanne femme de Jullien

Martin passant alors, se sont salluées

et parlé ensemble sans avoir aperçu en elle

qu’elle fust troublée. Ayant fait l’inquisition

cy-dessus le corps a esté apporté au

simetiere de la Ferrière auquel lieu a esté

ensepulturé comme ayant esté tousjours

de l’église catholique.

la Ferrière aux étangs AD 61 EDPT186_2 - vue 12